Il-papà mar xtara mobile,
Mudell ġdid tassew sabiħ!
Nesa l-video u l-gazzetti,
Ilu ġimgħa ħsiebu fih.

“X’meravilja!” jibda jredden,
“Żgur bħal dana qatt ma rajt,
Anki jdoqqlok Happy Birthday,
W għall-Milied: is-Silent Nigħt.

“Fih il-logħob bħal tal-kompjuter,
U messaġġi li jkellmuni…!”
U dam siegħa mrekken waħdu
Medhi jagħfas il-buttuni!

Liz-zijiet ċemplilhom kollha,
Lill-ħbieb tiegħu u l-ġirien,
Lin-nanniet u lill-kuġini,
Il-card ħlieha f’tlitt ijiem.

Ma’ kull ħarġa, ma’ kull qadja,
X’battikata, x’waħda din!
Dlonk tarah bil-mobile miegħu,
Bhal pistola f’ċintorin.

Hu u jsuq iħobb iċempel,
Jagħmel l-isbah diskussjoni,
Għad xi darba jaqbdu l-Warden
U jċapċaplu ċitazzjoni!

Fi triqitna għal għand in-nanna,
Illi toqgħod in-Naxxar,
Dorna lura mħabba l-mobile
Għax insieh warajh id-dar.

Il-Ħadd l’għadda, fil-quddiesa
Smajt ħoss ċkejken, mużikali,
Kien il-mobile qed iċempel
F’nofs is-Salm Responsorjali.

Fid-dar tagħna l-ħajja nbidlet,
Għandna ċerta serjeta’,
Sirna aktar effiċjenti
B’dan il-mobile tal-papà.

U x’ħin rani mmissu nitfa,
Trid tarah… qajjem irvell!
Ħatafhuli minn idejja,
Qalli: “Dak mhux ġugarell!”

“Kelli n-notes ta’ kull lezzjoni,
Kelli l-homeworks ippjanati,
Kelli l-marki tagħkom kollha,
W anki x’copies għandi nagħti!

“F’tebqa t’għajn sparixxa kollox,
Dehret stampa sewda biss,
Ġie t-technician, xengel rasu,
Qalli: ‘Ħeqq… m’hemmx x’tagħmel Miss!’ ”

Martin Vella għolla sebgħu,
Qallha: “Miss, din naf kif ġrat;
Żgur dabbart daqsxejn ta’ virus,
Kif kien gralu s-Sur Muscat!”

“Skużi Miss, ’mma dan tort tiegħek,”
Qabżet tgħid Charmaine Mugliette,
“Int suppost li malli tlesti
Tagħmel back up fuq diskett!”

“Il-papà dejjem jgħidlina,”
Qabel magħha John Brincat,
“Min qatt ma jissejvja xogħlu
Ikun veru traskurat!”

“Issa isktu,” l-Miss qaltilna,
Isa… oħorġu ktieb… bil-kwiet;
Irrid nara ’l kulħadd jaqra;
Għandi bżonn nofs ta’ nhar skiet!”

U jien fraħt, għax din il-biċċa
Qatt kont għadni ma rajt bħalha!
Kemm inħobbha lill-Miss tagħna!
Il-kompjuter ikkraxxjalha!

Kemm hi ħelwa n-nanna Lucy
Ta’ kull darba li mmur ħdejha,
Tkun quddiem it-televixin,
Bir-remote miżmum f’idejha.

Tibda tgħidli: Rajtu l-bieraħ;
Kien hemm western ta’ John Wayne?
Dnub li f’nofs kelli ndawru,
Għax ridt nara l-kwiżż tat-Tnejn.

Hemm iċ-ċampjin ta’ dan l-aħħar
Tassew ġenju! Jiskantani!
Imma f’nofsu, qlibtlu nitfa
Sa ma jlestu mir-reklami.

Sibt għaddej dokumentarju…
Ma nafx sewwa fuq xiex kien,
Ġab salt Għarab fuq iż-żwiemel,
U deżerti kullimkien.

U ġab l-iġmla qed jixorbu
Minn għadira ħdejn oażi,
Hedejt nara… w ħaqq ix-xjafek;
Anki l-kwiżż ħareġ minn rasi!

Meta qlibtlu sibtu spiċċa,
Naħseb siegħa sħiħa għaddiet,
Sibt l’anki t-telenovella
Kienet ilha sew li bdiet.

Ma stajtx naqbad l-għaliex Carrie
F’nofs ta’ lejl telqet mid-dar,
U kif f’daqqa, sabet ruħha
Tibki w tolfoq ġo l-isptar.

Ma stajtx nifhem … u dawwartlu!
Xi pjaċir! X’kapaċita’!
Fuq ir-RAI kien hemm xalata,
Programm sħiħ ta’ varjeta’!

Kien hemm grupp ta’ kitarristi,
W ieħor jagħmel il-maġija;
Imma f’daqqa, ħabta w sabta
Naħseb għajni marret bija.

X’hin stenbaħt kien spiċċa kollox.
L-aħbarijiet biss kien hemm…
Għandu jkun reħgħu bdew jagħtu
Xi mkien qrib Ġerusalemm!

Issa llum nifli l-gazzetta
Għall-programmi… b’attenzjoni;
Għax irrid nerġa’ ndur kollox
Nara ’kk mhemmx repetizzjoni!

Ziti Mandy marret ġita
Ma’ Dun Bert il-kappillan,
Waslu Ruma l-Ħadd filgħodu
Fis-sagħtejn kienu Milan.

Sebħu t-Tnejn ġol-belt ta’ Vjenna,
Iżda xejn ma tilfu ħin,
Sa fl-għaxija kienu Munich,
Stutgart, Frankfurt u Berlin!

Wiċċha vampa z-zija Mandy
Tiġri w tagħqad daqs żugraga,
Klikk – klikk- klikk – ritratt war’ ieħor
Sabet ruħha ġo nofs Praga.

U t-trejn sejjer — dejjem sejjer…
“Dritt lejn Warsaw nivvjaġġaw!
Ġa rajnieh! Tlaqnieh warajna!
W issa ġbidna lejn Krakaw!”

Ħadu l-breakfast l-Ungerija,
F’Moska kielu ikla bnina,
Min-North Pole xtraw semi-freddo
U fl-għaxija raqdu ċ-Ċina.

“Dak il-ġmiel,” iz-zija qalet,
“Biex tarah trid seb’għajnejn!”
(Għalkemm qattgħet din il-ġita
Nofs fil-kowċ u nofs fit-trejn!)

U ġiet lur’ għarqana xraba,
U b’nifisha daqsxejn fgat;
Iżda qalet li f’dil-ġita
Kważi d-dinja kollha rat!

U għalhekk, għas-sena d-dieħla
Ġa ppjanat, iz-zija Mandy
Illi s-sajf tmur tqattgħu kollu
Għall-mistrieħ ġo flat ix-Xlendi.

Jekk hemm xogħol trid tiskartah,
Jew il-homework tiffrankah,
Isma’ minni — agħmel bħali,
Se ntik formola speċjali:

Kull met’ommi tgħidli: “Paul,
Ej’ ħa tgħinni f’biċċa xogħol,”
Noqgħod kwiet, ma nweġibhiex,
Għat-taparsi ma smajthiex.

Ħdejha mmur bil-mod, il-mod,
Nimxi nfekren u nirtogħod,
U ngħidilha, mans daqs nagħġa:
“Xi trid, Ma? Naqdik f’xi ħaġa?”

Ommi mara panikuża,
Tagħmel għaġeb fuq nemusa,
Għandha ċerta fissazzjoni
Fuq is-sogħla w il-flissjoni,

Fuq l-uġigħ taż-żaqq u d-dahar,
Allerġiji kbar u żgħar,
L-iċken riħ tarah bronkite,
Ażżma, sogħla w pulmonite.

Għandha fliexken ta’ kull sura
Qtar u pilloli w mistura,
Kxaxen sħaħ sax-xfar mimlija
Donnhom kienu spiżerija.

Hekk kif ommi tħares lejja
W tara d-dmugħ fi xfar għajnejja..
(Għax dal-fatt jeħtieġ tifhmuh:
Jien naf anki nġib id-dmugħ!!)

Tgħidli: “X’għandek, x’waħda din?
Għajnejk jidhru miksurin.
Itla’ ‘l fuq… u x-xogħol insieh!
Mur ġos-sodda! Fittex strieh!”

U tagħtini asperina,
Jew xi mgħarfa mediċina,
(Hemm mistura ftit safrana,
Togħma bnina ta’ banana!”)

Ħafna xogħol b’hekk niskartah,
Ħafna homework niffrankah…
Iżda ’kk ommok mhix mazzun,
U nzertat ġurdien brikkun;
Ħeqq … ma nafx kif taqbad tfehimha
F’dak il-każ… għandek problema!